今日放工坐同事車去咗北角. 每次去到北角, 我都定必返去舊居附近, 點解? 一來嗰度有架小巴可以又平又快又直接去到我屋企樓下, 二來(最重要), 附近有一檔魚蛋非常美味, 以前住北角嗰時, 差唔多日日去幫襯(年初一都照開檔). 由 $3 加到現時 $4 一串; 由車仔檔做到搬入舖; 由只賣魚蛋, 墨魚, 到賣小籠飽; 由只有外賣到而家有堂食(戶外), 數一數, 我都幫襯咗11年喇.

究竟有咩咁吸引?

1. 平 ($4 有6粒)

2. 魚蛋好彈牙

3. 辣汁勁好味(食嗰時你唔會覺得辣, 1分鐘後你就知味道). 同旺角嗰d 無得比.

店舖位於堡壘街, 叫做麥記美食, 下次如果大家去到北角, 記得試一試, 除咗魚蛋, 佢d生煎包, 小籠包都好好味架.

今日本人有幸可以去Disneyland Hotel, 點解?? 因為今日係本公司(Arrow) 嘅annual dinner (Arrow 嘅 annual dinner 只係俾客, 唔係每個staff都有得去), 而我, 因為要去做support, 所以可以去參觀一下.

今日下午3:45 已抵達酒店, 酒店門口俾我嘅印象唔係五星級酒店, 而係烏溪沙青年營. 之後就落咗去function room (Cinderella Room) set機, 4:30 已完成, 見暫時無乜嘢做, 便周圍行吓, 行入酒店, 有少少時光倒流70年嘅feel, 我又行咗出去酒店嘅花園, 嘩! 終於再次見到一望無際嘅海.

行咗陣, 便返去睇吓有乜幫手.本來想7點左右就走, 但遇著有d白痴嘅user, 只係用Word 同埋print 吓嘢, 都可以做到一塌糊塗, 我睇唔過眼便去幫手, 一幫便做到成8點, 見都入晒席, 又預咗位俾我同幾個較為相熟嘅同事坐, 就坐底食一陣, d 餸都幾好食, 但就無魚翅食 (廸士尼係懶環保, 無魚翅), 換嚟嘅係鮑魚羹, 非常美味, 仲有個焗蟹蓋, 將成隻蟹拆肉釀入蟹蓋度焗, 食完都飽lu……yummy. 我食到9點左右便行去搭shuttle 去廸士尼站轉地鐵走……

由於今年旅遊大計的目的地擁有特區護照免簽証入境, 本人終於的起心肝去申請, 其實之前都有計劃申請, 因為現在特區護照已改為電子護照, 在未加價前要拿拿淋攞返本. 所有文件我都準備好, 只欠一幅相, 新嘅特區護照相片要求要係白色背景, 和回鄉咭一樣(我嘅回鄉證, 無錯, 係”證” 今年底終於到期, 可以申請回鄉咭喇!), 本以為影一次便可以申請晒兩樣. 今日行過本想影相攞咗特區護照先啦……點知, 特區護照同回鄉咭相片size要求不同,  咁都算喇, 最麻煩係特區護照要求多多, 因為要遷就新護照防偽設計, 衣服太深或太淺都唔得, 咁咩色得呀? 今日我著咗深灰色上衣, 只好擲日再影, 仲有申請特區護照只需1張相, 出面影親都起碼半打, 個5張用嚟做乜??

 都唔明點解 BNO, 特區護照同回鄉咭d相片要求唔可以統一, 全部都只係比香港人申請, 統一晒唔得嘅, 樣樣影半打, 要嘅只係一張, 麻鬼煩.

今日深圳之行又再延期, 於是就過咗半日闊太嘅生活.

下晝去咗Landmark 逛咗個圈, 唯一斬獲就係見到幾個明星, 跟住同個friend去咗Cova high-tea.

去到中環, 見到好多人拿住今期至熱既H&M紙袋, 滿載而歸咁, 梗係要去行吓啦. 我哋兩個去到門口, 見到排晒隊, 於是向上環方向行去搵龍尾, 點知個”食蕉”話條龍尾係天橋底(通往半山行人電梯), 嘩! 點排呀! 算吧啦, 搵日放工再嚟. 於是就轉戰IFC.

 行咗成日都無乜斬獲, 有d 衫都ok, 但係當想到過多兩三個星期又減價, 收手, 到時先買啦.

終於完成喇! 一年一度的渣打馬拉松今日舉行.

因為我參加的十公里在7:05 開跑, 今朝四點就要起身, 地鐵亦都提早運作, 接送參賽者. 在地鐵裏面見到好多平日見唔到既情境, 有人係度熱身, 拉筋, 換衫……非常有趣, 而我, 當然繼續做周公既 fans 啦.

我們一行四人約了係麥記食早餐, 奇怪的是, 排隊去廁所條龍遠超越買野食. 食完之後就交低行李. 未天光的尖沙咀, 除咗麥記之外, Adidas 都唔放過機會開門做生意, 仲安排有人在門外教人熱身及於店內 massage.

其實十公里係行多過跑, 唔係唔想跑, 但實在人太多, 想跑快少少都好難, 仲有幾次險些兒被人撞倒. 成條賽道最辛苦都係如之前所料----西隧內, 好焗, 好熱. 在邊跑邊行的情況下, 本人以大約個半小時完成. 賽後大會亦派發了蕉, 雪梨, 朱古力, 雨衣, 撤隆適 (得一塊, 比左腳定右腳??)

之後, 又去食第二輪早餐, 跟住便回家沖涼, 再睡…….

十公里無想像中咁難, 我老豆見我跑完仲有命返黎, 佢話佢出年都跑!?