24-25/May/2007

第八天, 亦可以話係最後一日, 因為今日下午5點幾就要搭飛機離開, 諗起都灰.

今日只有一個行程, 所以10點先出發, 早上有時間在酒店影吓相. 酒店花園可以遠望金字塔, 佢哋連d樹都剪到金字塔形, 好得意.

今日唯一一個行程就係去市集shopping, 大約11點到達, 有個半鐘頭比我哋行, 其實都唔係好夠時間, 試諗, 9 天行程, 唔計之前樂蜀嗰1個鐘 (額外加), 只得1.5 hr, 仲要講價, 真係唔睇得好多, 個guide 仲話有時間可以影吓隔離嘅清真寺又或者坐底飲杯茶 , 行都唔夠時間啦, 仲話飲茶. 短短時間, 我只買咗香水樽及幾個金字塔咋.

之後, 就去市內餐廳食lunch, 到兩點就出發去機場, 由於星期四係回教國家嘅週末, 所要驚塞車, 預多d時間出機場.

唉! 又要返到勁混亂嘅機場, 經過一番擾攘, 過埋個所謂嘅Immigration, 都只不過3點左右, 個候機室又無乜嘢行, 好辛苦才等得到上機. 開羅去多哈大約3 小時, cabin crew d service 差到暈, 問佢哋攞張氈, 上機等到落機都無, 攞杯熱水, 等咗半個鐘, 再叫就比咗杯凍水, dinner 有 chicken and lamb, 問都唔問都車個羊落嚟, 之後問佢先話無雞.

到咗多哈, 今次無day tour 喇, 只有喺呢個”百無”嘅機場等4個幾鐘, 但係我哋最驚嘅係呢個機場有前科delay, 好眼瞓呀, 唔好再delay呀. 多哈個機有一間Quiet Room, 可以比人入去瞓覺, 我哋都諗過入去ga, 但驚瞓咗上到機瞓唔倒, 於是去咗 cafeteria 度坐, 將剩餘嘅零食, 乾糧晒冷, 有團友仲攞熱水食埋杯麵, 大家一齊打機, 睇雜誌, 食嘢, 好似24小時營業嘅老麥.

出乎意料, 班機無delay, 我一上機就瞓, 連起飛都唔知, 宵夜都無食, 醒嗰時都食brunch lu…..

飛機越接近香港, 亦代表今次埃及之旅結束, 又要返工…… 好灰

23/May/2007

今日可以話係玩足全日, 由於由洪加達去開羅係要軍警開路, 我哋就嚟一次午夜大逃亡, 零晨1點出發. 由洪加達去開羅需要7 個鐘頭車程, 可以上車再瞓, 但係就危險咗d (之前埃及交通意外就係呢條路), 我瞓到半夢半醒之間都feel 到架車左轉右轉, 同一條長長嘅車龍. 今朝嘅早餐只可以食餐盒, 有幾款麵包, 烚蛋, 生果, 果汁, 都幾豐富. 大約八點左右到達開羅, 個guide 先安排我哋去一間酒店梳洗, 之後就係第一個景點, 沙達墓, 沙達係近代埃及人最敬重之總統, 都係到此一遊, 喺門口影幅相.

跟著就係我嚟埃及嘅目的 – 金字塔, 喺埃及, 有大大小小50幾個金字塔, 我哋去嘅係位於吉薩胡夫三爺孫金字塔, 睇完金字塔遠景之後, 又有機會騎駱駝喇, 但係今次d駱駝無沙漠嗰d咁企理, 我哋本來一人騎一隻, 點知條友將我哋兩個逼埋一隻, 有個團友仲慘, 未上到隻駱駝, 隻駱駝就起身, 恐怖, 騎完之後, 仲不停問你攞tips, 我更係有咁快走咁快啦. 之後就去近距離睇金字塔, 仲入咗中間嗰tim. 金字塔條通道只有1米高, 行入去都要屈低身, 入面又焗又熱, 為嘅都係一暏入面個石棺. 之後周圍影相, 我仲爬高執咗塊石仔返嚟tim, hehe. 喺金字塔後面就係獅身人面像, 比我嘅印象, 吓, 就係咁ga jar?

Lunch 我哋喺獅身人面像隨離間無冷氣餐廳食, 個view ok, 但餐廳環境麻麻.

After lunch, 我哋去世界三大博物館之一, 埃及博物館, 入場都要經過兩層x-ray, 門口比影相, 入面唔比帶相機, 但有d人喺入面用電話影. 入場費唔包睇木乃伊, 要睇, 喺木乃伊館門口比100埃磅, 木乃伊館有兩個, 一男一女, 分別有大約10 件木乃伊, 亦都係全場少有有冷氣嘅地方. 博物館入面仲有大量圖坦卡門嘅陪葬品. 呢個博物館嘢就多, 但好亂, 又無乜註解, 應該整理吓.

之後就係旅行團必有嘅”水魚舖” 但呢個團只有兩間 (香水, 紙沙草畫), 好快過.

晚餐安排食中餐, 味道就……七餸一湯, 白飯任裝, 有個團友覺得唔老黎, 要求加多一個餸, 我哋諗個廚會煮乜, 會否將我哋呢幾日食過嘅番茄, 洋蔥, 青椒炒蛋… Bingo, 我哋估中喇!

之後便返Hotel, 我哋住嗰間叫 Sofitel , 唔知點解個門口又係裝修緊, 但入面又係好正. 但最恐怖係酒店走廊d燈係綠色, 人都唔多隻, 又無指示, 好容易迷路. 間房都好正ga, 又有花園, 係d冷氣唔夠涼, 同d燈暗d, 電視有好多台, 仲有利物浦對AC米蘭睇. 酒店個Lounge 氣氛都好正, 有人彈琴唱歌, 我哋仲約咗d團友去飲嘢tim.

22/May/2007

第六天嘅行程, 我哋比咗US$45參加紅海遊嘅Tour, 呢個行程都好豐富gar. 上午10點出發, 坐大約半個鐘頭車到碼頭, 再轉乘遊艇出海, 在船上, 我冒住被晒死嘅危險, 第一時間走上船頂, 因為我驚暈船浪 (雖然一早食定暈浪丸). 船航行期間, 見到好耐無見過湖水藍嘅海, 水中充滿紫色嘅水母, 滿天信天翁, 仲有兩條海豚贈興, 嘩!好relax 好爽呀! D 船員話唔係成日都可以見到, 我哋真係好好彩.

船大約於12點到達沙灘, 我哋便於海灘暢泳了1小時, 水中仲有好多魚仔, 但魚仔隔離一定有水母, 好驚. 在海灘, 好大風, 浮喺水面, 會自然吹到海灘邊線, 個 local guide Sayed 都好盡責, 佢唔識游水, 都著住件救生衣在海中睇住我哋.

之後便上船食lunch, 唔知係咪肚餓, 個lunch都ok ga, 有類似KFC嘅炸雞, 西瓜, 支裝可樂, 但都唔敢食咁飽, 驚嘔返出嚟. 下一個節目係釣魚, 但除咗船員外, 無一個釣到.

跟住就係重頭戲 – 浮潛, 我落水前已經講明唔識游水, 所以會有人帶住, 但當我落水嗰一刻, 無人嘅? 之後就比人推咗落水. 落到水, 我爬咗幾吓之後, 帶我個friend 個船員叫我過去, 佢諗住一拖二, 因為珊瑚堆唔係一落水就係, 要游開小小, 但帶帶吓, 又將我交咗比第二個, 他帶到我去珊瑚堆之後, 有個團友游過嚟叫個船員去救返飄到好遠嘅團友, 因為浪好大, 基本上浮喺度唔游, 都會飄走. 個團友於是嘗試帶返我返船, 但我哋逆水而游, 游極都唔到, 我開始驚….. 最後經過幾個船員輪流拉我返去, 終於上到船, 佢哋識游水嘅都話我唔識游水都夠膽玩, 我話有救生衣同埋無諗過咁大浪. 而家諗返都好驚.

返到酒店大約4點幾, 有團友話之前一日喺酒店沙灘見到好多魚仔同海胆, 於是便出去睇睇, 但可能太大浪, 同事實差好遠. 我緊係唔會浪費酒店嘅facilities, 點都要去泳池游一游, 但點解d水 “少咸”嘅? 諗返之前一晚出去泳池邊散步, 見到d人洒d唔知咩落水, 應該係鹽嚟.

晚餐於酒店食buffet, 今晚主題係意大利菜, 點解無 Tiramisu?

After dinner, 出咗出面行一陣, 酒店對出有好多店舖, 好似Park Lane, 但當個local guide 講呢度唔會買到平嘢, 都無乜心機睇, 之後返房稍作休息, 諗住夜d再去海中嗰間餐廳飲嘢, 因為零晨一點又要起程出發返開羅, 都無諗住瞓, 但最終都敵不過睡魔, 瞓咗個半鐘.

21/May/07

今天又要一早出發, 因為要就8點軍警開路去洪加達. 由樂蜀去洪加達嘅車程須要大約4個鐘. 到達後, 我哋先去一間海鮮餐廳吃午飯, 落車第一個感覺 – 爽, 雖然都係好晒, 但起碼有涼風, 同之前喺樂蜀簡直有天壤之別. 而午餐,  起初都無乜特別, 只有埃及薄餅及沙律, 好好醜醜一餐算啦, 點知呢d只係頭盤, 主菜居然有蝦, 蟹, 魷魚, 魚, 係嚟咗埃及最豐富嘅一餐, Yummy!

午餐過後, 便回酒店, 我哋住Desert Rose Resort, 當旅遊車駛往酒店途中見到好多靚酒店, 好似 Las Vegas 咁, 好期待自己嗰間會點之際, 吓! 到喇, 門口都睇唔到, 原來酒店門口裝修緊, 我哋間酒店好易認, 門口乜都無, 覺得似監倉多d, 但入面個環境都ok, 有3 個泳池, 1 個對住紅海嘅私人沙灘, 好有度假feel.

跟住我哋比咗US$85去玩沙漠四輪電單車 (Bike Safari), 行程為4小時, 個 local guide suggest 我哋買一塊頭巾, 如果唔係會食沙都食飽, 最後用30埃磅買了一條, 好彩買咗, 夜晚洗嗰時伸手入盤水入面, 隻手都睇唔倒, 仲搞到我件風褸染了油漬, 清唔倒. 架車好易控制, 用手指公加速, 所以隻手指都好痛. 當我哋大約揸了1 個鐘, 到達一個camp, 原來呢個package仲包埋騎駱駝, 參觀沙漠部族, Dinner, 睇日落, 我哋仲加埋睇星. 同我哋一個camp嘅仲有幾班外國人, 佢哋仲有成隊camera crew, 我哋估會唔會係外國嘅Lonely Planet 見到我哋.之後在回程途中睇日落, 睇星星, 有個同事話要沙漠d沙做手信, 於是我專登攞個袋去拿了一袋回來.

返到酒店都差不多8點, 酒店仲有buffet食, 但只食了小小, 都無乜胃口, 只想沖涼, 早d瞓, 準備明天嘅紅海遊.

20/May/2007

Temperature: Min: 24   Max: 43

今日係成個行程最辛苦嘅一日, 因為下午氣溫達43度, 早上我哋先去樂蜀西岸, 因下午會非常熱, 我哋先去帝王谷, 係多代法老王嘅墓地, 參觀咗3個陵墓, 都係睇吓入面d壁畫, 嗰度環境我覺得似石礦場. 之後就去咗女皇大殿, 無乜特別, 只覺得去咗火舞黃沙拍攝現場, 仲熱到令我破介飲咗半罐可樂. 下一個景點就係孟農神殿, 只係到此一遊, 影幅相.

跟住旅行團加送咗一程Felucca, 風力帆船, 但由於無風, 最後都轉了隻快艇.

下午嘅行程, 3 點出發, 我哋飯後睡著咗, 2:50 先紮醒, 急速攞袋出發. 第一個景點係卡納克神殿, 係現時保留到最大嘅神殿, 地方好大, 但好熱, 都無心機睇, 仲見到有鬼妹中暑. 跟著就到咗樂蜀古廟, 可能睇得太多, 無乜心機, 只係想揾個涼d嘅地方.

參觀後, 有時間, 便安排咗去Luxor Maket, 可以shopping 吓, 但賣嘅嘢千篇一律, 最費時係講價.

晚餐於船上係set dinner, beef or fish, 當然 beef la, 今晚 night program 係 Belly Dance, 我去睇咗陣, 見到個 dancer 肥到都反胃, 15 分鐘就走.

19/May/2007

今日一早就要出發, 隻船早上6點左右到Kom Ombo (金安寶), 又名Gold City, 我哋上岸參觀金安寶神廟, 係供奉鷹神及鱷魚神, 裡面仲有鱷魚木乃伊. 參觀後回船途中見到有個細路兜售手鏈, 佢開價US$1 (佢哋嘅口頭禪), 之前上網睇到d人話可以用原子筆換嘢, 於是便試一試, it’s work!, 我哋用兩支原子筆換咗兩條鏈. 之後便趕返上船, 因為隻船會係8點開, 前往下一站 艾特夫(Edfu).

遊船於12點到達, 上岸乘馬車往艾特夫神廟, 此廟又係紀念鷹神荷力斯事跡. 但比我嘅印象係好熱, 好晒, D馬好嗅, 個馬夫成日問人攞Tips.

之後便回船, 隻船於下午2點開往樂蜀, 我哋今日嘅行程亦完結. 遊船亦幫我哋安排節目, 4點於甲板有下午茶, 晚上9點又有”阿拉伯之夜”, 可以於船上比US$5租一套衫熱鬧吓, 我本來想去睇睇, 但最終都敵唔過睡魔.

今日下午6點左右, 隻船經過水閘, 其實4點左右已到, 但等到6點先過到, 成船人都上晒甲板睇.

18/May/2007

氣溫: Abu Simbel: Min 20, Max 36

經過大約12個鐘車程, 火車到達亞斯旺, 火車提供嘅早餐係全”包”宴, 對於我討厭食麵包嘅人, 於是再一次出動合味道.

到達亞斯旺, 第一個景點係大水霸, 無乜特別. 之後便去未完成方尖石碑, 以前法老王會將佢地嘅事刻喺方尖碑上, 但呢支有裂痕, 便棄置喺度.

跟住就係重頭戲 – 阿布辛貝神廟, 呢座廟有3300年歷史, 被譽為世界最有價值嘅古建築遺跡, 因為要起水霸, 所以成座切割成2000 幾塊搬到現址, 據說以前每年 21/2 及 21/10, 即係拉美西斯二世出生及登基日, 太陽第一曙光會直射神殿中央, 但搬後, delay 咗兩日.

去呢個temple, 須要軍警開路, 所以只有兩段出發時間, 0400 or 1100, 但由於我哋隻遊船會喺半夜開, 所以只好喺11點出發, 車程接近2.5小時, 到步已經2點, Lunch 都係喺車食lunch box, 但途中可以見到海市蜃樓, 好似有個島喺你附近. 去到雖然烈日當空, 但都有Lake Nassa d 風吹吓, 都ok (而家諗返). 喺神廟出面有好多店舖, 他們大多開天殺價, 我見到d postcard 幾靚, 便問佢幾錢, 佢開價65埃磅 (嘩! 接近HK$100), 最後我哋用15埃磅 買了兩套.

遊覽完畢, 便回我哋連住3晚嘅遊船 -- Mirage, 隻船有5 層, 最下層係餐廳, 我哋一日三餐嘅地方, 之後就係大堂, 3/F 係房間 及商舖, 4/F 係 Pub 及房, 5/F係Sun Desk, 我哋住喺3/F, 間房都OK.

 今晚係食set dinner, 只有 chicken or Fish, 我當然要 chicken la. 味道ok, 但好熱氣.

17/5 零晨1:50 起飛, 睇住duty free 逐一關門, 喺機場候機室, 睡魔已急call, 好辛苦先等到上機., 一上機食完佢嗰餐便倒頭大睡. 卡塔爾航空嘅座位比CX寬敞, PTV 亦比較大, 如果前面張櫈泊落嚟, 真係睇到頭暈.

氣溫: 多哈: Min 29, Max 38; 開羅: Min 20, Max 31

經過8.5 鐘頭機程, 到達多哈只不過 5:20am. 航空公司安排咗一個 3 個鐘嘅city tour 俾我哋. 本來滿心歡喜可以途經半島電視台(拉登發送片段嗰間) 影幅相, 點知只係老遠見到, 逗留得最耐嘅係馬術俱樂部同埋家樂福, 無錯家樂福, 因為個guide驚我哋食唔慣飛機餐, 叫我哋買d小食, 我哋兩個用了 US$4 買了半隻燒雞同埋一筒薯片, 點知返到機場, 個guide 同我哋 fight 到breakfast, 加埋隻燒雞, 都飽lu…. 所以第2程機, 一上機就瞓, 連飛機起飛都唔知. 講開多哈, 個機場乜嘢facility 都無, 好彩地都有Samsung 賣廣告, 擺咗十幾部機比人上網, 但只有大概10部用得, 其餘都lock 晒, 我都排咗15分鐘,  有個鬼佬唔小心lock咗部機, 比佢撞倒唔駛password, 於是佢叫我試佢隔離部機, 又得wor, 於是可以上msn chat 吓, 如果唔係時間都唔知點過.

又經過3.5 個鐘, 下午5點左右終於到達開羅, 比我嘅第一個印象—混亂, d人周圍食煙, 連immigration 嗰個人都一路做一路食. 由於要就尼羅河船期, 所以一到步便要趕去火車站搭火車去埃及南部亞斯旺, 途中經過一間supermarket, 買了一個蜜瓜仔上火車食. 我哋坐嘅火車係頭等車卡, 一卡有10間房, 但每間房只有30呎, 有獨立洗手盆, 廁所就喺房外, 一晚半晚算啦. 但見到佢提供嘅dinner, 我都係攞返自己個合味道出嚟lu. Dinner 過後, 個Captain 便幫我哋開張床瞓覺.

經過多翻阻滯, 埃及之旅終於完成, 今次簡直玩盡海陸空, 十分難忘. 每天都有不同嘅驚喜. 包括去咗一個富裕, 但發展中嘅國家 – 多哈; 捱一程12 小時嘅火車, 由開羅至亞斯旺; 喺沙漠見到海市蜃樓; 參觀一座被譽為世界最有假值嘅古建築遺跡 – 阿布辛貝神廟; 於樂蜀經過40幾度高溫而險些被”6”熟; 喺洪加達沙漠玩四輪電單車; 喺紅海上演一幕飄流記; 參觀世界七大奇景之一 -- 金字塔; 喺開羅博物館參觀接近20件木乃伊…….. 所有嘢都令我畢生難忘.

 http://travel.webshots.com/album/559179098VFKhET?start=0

http://picasaweb.google.co.uk/cecilialam28/

一年一度的大旅遊將於本星期四零晨起程, 今次的目的地係埃及. 好多人都會覺得好奇怪, 以我嘅性格應該係去日本 shopping, 但係偏偏就係去埋d “山卡拉” 地方.

話說係兩三年前睇完明珠台有個BBC嘅節目 “50 Places to Go Before You Die” 之後, 發現去旅行應該去d有價值嘅地方. 上年去日本, 已經係第4次去, 雖然每次去嘅地方同目的都唔同, 但發現除咗shopping 之外, 都無乜新意.

 數一數, 喺嗰50個地方入面, 我只係去咗12個地方, 唔知到我死嗰日去唔去得晒?