| Cecilia's profileDevilBlogListsNetwork |  Tools  Help |
|
November 02 華東之旅 20097 日之旅程, 可以話黑到脾嚟形容, 但其實又可以話逢凶化吉 出師不利 - 由於乘8:00機, 只可趕最早班City Flyer 去機場, 班車 5:45 到站, 一切都好順利, 點知架車過了青嶼幹線收費亭, 停站落客後, 車門關唔到, 司機試了 5 分鐘都未能將車門關上, 由於Long weekend 將至, 好多人都趕飛機, 大部份乘客開始起哄, 把好夢正甜的我吵醒了, 即刻攞埋行李轉車. 好彩都趕得切 check in, 並於 Final Call 時登機 密碼突轉 - 明明用開同一個密碼開行李都無事, 點知到第四日遊完西湖返酒店執埋行李走人之時, 個行李鎖開唔到, oh god, 點算呀, 改密碼要搵尖嘢篤住先改到, 我無理由會改到個 password, 試了5 分鐘都唔得, 於是亂撞, 又好好彩撞中, 但點解會由原本 “ABB” 改咗做 “DBB”, 依家仲係一個謎 長廊封了 - 去上海當然必去外灘, 但由於世博關係, 成個上海都沙塵滾滾, 連黃埔區外灘長廊都封了, 未能望到浦東靚景, 連原先諗住坐擺渡過黃埔江, 都只可以改為搭地鐵 September 01 I’m Lovin’ It …. Part 2除咗香港老麥有可樂杯換, 其實世界各地都有, 仲要唔同款添! 多謝同事Anita 的通知, 英國有另一款杯換, 我即刻二話不說聯絡駐當地買家(我細佬).
但要知道英國老麥係一間極高消費嘅餐廳, 食一個加大餐都好昂貴… 當然為咗賺錢, 可以用現金價 99p 買一隻.
雖然仲欠一隻藍色, 但真係好感激買家s 的幫忙, 下次有乜可樂item (紅罐)唔駛問我ga la, go ahead la. July 31 I’m Lovin’ It老麥近呢幾年越來越多嘢換, Hello Kitty, Snoopy, 12生肖公仔…. Sorry, 以上嘅都唔啱我. 但身為超級可樂迷, 今次所換的都無得走雞….. 一套6款嘅可樂杯, 叫我愛不釋手 (印象中我好似n年前喺美國買個隻綠色, 但唔知去咗邊) 只要喺老麥食加大套餐就送你1隻, 但6個加大餐對我嚟講係一個高難度, 所以老麥又有另一個賺錢方法, 只要放底HK$120, 全套就係你! 除返開$20一隻, 總好個食6個加大餐. 呢套杯如果早一個星期出, 我還身處袋鼠國, 想換都換唔倒, 時間啱啱好, 無藉口唔換. July 01 7.1 回歸每年的 7.1 都係我的回歸紀念日….. N年前的今日, 我從澳洲回歸香港, N年後的今日, 我又回歸了澳洲. 有咩唔同? 以前是學生, 衣食住行樣樣慳住慳住, 今次是公司出trip, 一日3餐全包, 只要合理的都可以Claim. 今次係第一次嚟墨爾本, 一開電視就睇到廣告話 Super7 (類似香港六合彩) 星期二jetpot 有成AU$90 Million…..即刻去買返張啦, 1 注7個number都係AU$1.1, 當買個希望都好. 最後…….又做了善事.
仲有我又再一次低估澳洲太陽的威力, 雖然是冬天, 而我只係喺架車入面晒了5分鐘, 都已經出事, 搞到塊面赤赤痛. 澳洲之行只開始了3天, 仲有22日慢慢捱…….. June 30 命運是你家天生你是錯 不屈不撓的男子
May 10 星洲手信識我嘅人都知我不太喜愛新加坡呢個地方, 但對當地的美食就…..流晒口水. 早排細佬去了新加坡一趟, 手信除了果味益多, 林志源肉乾, 仲有一樣就係我已戒了多年及令我一吃難忘的….杯麵.
食後感: 叻沙味: 夠香但唔夠濃, 一般 辣椒蟹: 辣椒味帶甜, 好油, 但最失敗之處係…唔係真材實料, 用嘅係 “魚肉仿蟹柳” 冬陰味: 我的至愛, 夠辣, 好有冬陰功feel 朋友們, 下次去新加坡知道買咩比我啦! April 01 由零開始回憶 纏住了心事千遍
March 30 賠返件衫比我呀!!點解我件超喜愛Tommy Hilfiger冷衫會由白色變成粉紅色?? 點解? 點解? 點解? 明知洗白色嘢就唔好放你嗰件紅色入去, 都唔係第一次ga la 今次報銷了兩件衫, 阿媽,盛惠你$700. 賠返比我呀!!! February 18 台北之旅 – Day 4Day 4 – 台灣民主紀念堂, 永康街, 台北車站, 西門町 今日係旅程嘅最後一日, 一如尋日, 放棄酒店早餐, 只飲了杯咖啡, 之後就出發去中正紀念堂, sorry, 而家比阿扁改咗做台灣民主紀念堂.去呢度都係為咗影自由廣場幅相, 加上由呢度行去永康街係最方便的.
由台灣民主紀念堂行去永康街非常簡單, 從大忠門出, 轉右直行, 15分鐘就到. 永康街名副其實一條食街, 鼎泰豐, 度小月本店都係呢度, 尋日食咗鼎泰豐, 今日就食度小月, 但度小月11:30 先開, 沿路有間冰館, 係我哋行程之一, 所以我哋嘅早餐就係刨冰! 呢度好多日本人幫襯, 但我覺得刨冰無雪片咁好食, 都係辛發亭雪片好味好多.
食完刨冰, 度小月開門啦, 但今日係假日, 每人最低消費要NT$100, 一碗担仔麵都係NT$50, 所以要叫多個小食.
又係時候回台北車站掃貨, 見對面馬路有巴士, 當然搭啦, 喺台北呢幾日好似搭巴士多過搭捷運, 因實在太方便.
 
返到台北車站, 喺新光三越門口今日好多function, 有唐禹哲concert, 又有Blackberry 擺booth sell Bold. 其實今朝早出發時已見到有fans喺度霸緊位.
掃完車站, 先返酒店放下今日嘅戰利品, 再出發去行程最後一站 – 西門町, 由酒店行去西門町其實隨時近過行去台北車站, 出返大街, 過條馬路已經係西門町尾. 西門町好似旺角咁, 非常多人, 我哋有最後3個幾鐘逗留喺度, 但係仲有天仁茗茶, 鴨肉扁, 阿宗麵線未食.
 好口渴, 先去天仁茗茶買杯嘢飲, 我選了香橙綠茶, NT$70, 雖然比夜市貴, 但好香茶味, 佢哋喺用茶葉沖的. 之後再去搵南蠻堂買蜂蜜蛋糕, 去老天祿買鴨舌, 再去埋對面菓風小館.
菓風小館入面d product 包裝非常得意, 幾可亂真, 放心全部都係糖嚟.
大買完之後, 行去路口間鴨肉扁食個tea, 入面只有麵or 米粉選, 我哋order 了米粉加一份細嘅鵝, total 只須NT$260, 物超所值, 非常美味. 之後再逛多一陣, 已經5點, 但飽到已經食唔落阿宗麵線, 只好放棄. 行返去酒店執埋行李去台北車站隔離搭巴士出機場. 之前講過想食Mister Donut, 咁多日都無機會, 為咗唔想後悔, 拉行李到巴士站後, 哀求(無錯係哀求) 職員比我哋放行李15分鐘, 我哋再用9秒9跑去台北車站food court 買兩個上車食, 兼仲要退返悠遊卡入面d餘額, 但台鐵點我哋去捷運問, 捷運又唔清楚, 叫我哋第二日嚟過, 喂!我哋今日走喇, 唔好玩啦! 最終都退唔到
好kawaii 嘅 Mister Donut 袋
今次走我哋坐港龍, 於二號航廈check in, 仲有Hello Kitty 候機室, 見到都有d打冷震
台北之旅 – Day 3Day 3 – 國父紀念館, 東區 (忠孝東路, 地下街), 信義區 (101, New York New York) 試過尋日嘅早餐, 今日決定放棄, 去食Mister Donut, 點知最近酒店嘅要去到台北車站個Food Court, 去到時9點, 成個food court 都未開, 只好開始第一個行程, 國父紀念館.呢個係到此一遊景點, 朝早無乜地方去ma. 剛剛遇上台北燈節, 到處放了好多花燈. 喺呢度仲可以影到101, 睇埋10點鐘換兵, 便去食早餐.
我哋沿忠孝東路行, 大約15分鐘便到216巷, 呢度有度小月, 鼎泰豐, 但由於時間尚早, 只有鼎泰豐開咗門, 於是我哋今日嘅brunch 係 - 鼎泰豐.
先嚟order 小籠包, 酸辣湯, 土雞湯麵, 個waitress 好好人, 問我哋土雞湯麵d湯會倒入麵一齊食定分開, 我哋話分開, 佢提議幫我哋做拌麵, 撈d麻醬. 食完之後, 都未滿足, 於是再叫多個蝦肉蒸餃. 走時都係11點幾, 門口已經人山人海了.
吃得太飽, 於是行吓東區地下街, 順便買埋阿蘇介紹嘅洪師父牛肉乾. 之後沿地下街由忠孝敦化行至忠孝復興, 其實好近, 又無嘢睇, 見到有間藥房, 買兩件Dr Wu 產品有77折, 於是便開始我們的shopping 行動. 買完再上地面行返去之前鼎泰豐條街去食阿蘇介紹嘅東區粉圓, 粉圓其實係珍珠奶茶入面d 珍珠, NT$50 可選4款, 我哋選了粉圓, 燒仙草, 愛玉 同埋 地瓜丸, 好好味, 又一個好介紹!
食飽又出發啦, 之前睇旅遊書, 在內湖區有個outlet, 在忠孝敦化站坐20分鐘巴士可以去到, 但去到之後好失望, d 野減咗價都好鬼貴.所以好快就走. 嗰度有巴士出返市政府站, 正係我哋行程嘅下一站. 坐上巴士, 諗住坐到總站, 可以瞓吓, 好彩無瞓, 呢度係無總站呢回事! 市政府站其實就係101, New York New York 地帶. 我哋先去誠品行過圈, 起初以為誠品只係書店, 原來佢已化身成一個Shopping Mall, 好似Loft + City Super + 書店 & CD 舗 咁. 之後去埋隔離新光三越A4館, 之前睇Magazine 介紹過呢度有款雞蛋布丁非常得意, 可以買返嚟做手信, 但它要雪藏, 於是決定夜d先返嚟買, 還掂今日餘下時間都係喺呢個area.
下一站…101, 可以從新光三越行去, 但行到有點累, 於是行返去市政府站坐 shuttle, 仲見到熊貓專車. 後來發覺如果由新光三越行去比起行返去市政府站坐 shuttle 係快d. 去到101見天仲未黑 (5:00pm), 係出面影吓相, 之後由於咖啡因癮發作, 於是喺101揾了間Barista Coffee 坐低take a break, 好抵呀! 我哋order Tea set, 任何一杯中size 咖啡 + cookie (3 pcs) 都係 NT$150, 點知order 咗之後, 佢哋只有一份cookie, 可以唔駛加錢比我哋換一份Cake (Orginal NT$180). Hea 了成個鐘, 天已黑了, 再出出面影過. 101 其實好似IFC, 所以都無乜點行, 由於仲係正月, 仲要今日係情人節, 附近都佈置了燈飾, 好靚.
由於book了今晚9:30於上閤屋食buffet, 仲有成2個幾鐘, 剛剛又叉完電, 於是行返去A4買布丁先, 之後再進攻New York New York 地帶. 撞啱又係weekend, 好多街頭表演, 但商場就無乜嘢睇, 幾經辛苦先捱到9:30pm. 上閤屋係一間日式buffet餐廳, 記得8年前嚟台北都未有呢間旗艦店, 但今次可能人太多, 又唔夠waiter, d service唔係好掂, 搞到越食越眼瞓. 但都食到成12點, 只好搭的士走.
February 17 台北之旅 - Day 2Day 2 – 北投, 淡水, 美麗華百樂園, 士林夜市
一早起身, 享用酒店供應的早餐, 選擇無乜, 味道麻麻. 之後行程開始….
第一站北投, 去北投梗係去浸溫泉. 我哋個Package包了溫泉券, 可以在表列溫泉入選一個, 我哋選了”春天”, 因價錢最貴.
春天溫泉旅館有接駁巴士, 在北投捷運站上車. 溫泉券在春天可享用露天溫泉, 我哋浸了前後兩個鐘便走人, 正考慮去邊度食lunch之際, 諗到在車站附近有間Royal Host, 之唔係台劇惡作劇之吻, 主角江直樹打工的地方. 如其嚟到, 就入去食個lunch. 之後再出發去淡水. 去淡水, 坐捷運由北投去都係20分鐘左右, 先去淡水老街行個圈, 其實有d似赤柱, 再參觀埋紅樓, 便坐巴士去漁人碼頭等睇日落. 漁人碼頭嗰邊搭緊個舞台, 原來小豬羅志祥會在2月14日喺呢度開concert. 再沿海邊一路睇日落一路行去情人橋. 之後便搭巴士回淡水站再搭捷運去劍潭.
到達劍潭, 第一站唔係士林夜市, 而係坐shuttle 去美麗華百樂園, 去嗰度唯一一個目的就係坐摩天輪, 同埋參觀台劇景點….哈哈! 唔知係咪睇台劇睇得多而且又有好幾套都喺呢度取景, 我哋兩個一落車就好似好熟路咁一支箭走去搭電梯上5樓坐摩天輪. 呢個摩天輪好平, 只須 NT$150 已包一次摩天輪同埋一次木馬, 當然我哋唔會坐木馬, 於是張木馬飛比咗兩個小朋友, 之後再行個圈就走.
今日最後一個景點 – 士林夜市, 因為係Friday Night, 所以特別多人, 條街逼到九彩, 好熱鬧, 嚟到呢度當然除了買嘢之外(我買了件tee 同埋對Converse), 就係飲飲食食. 我哋兩個喺行了兩鐘左右, 足足食了大腸包小腸, 繼光脆脆雞, 辛發亭雪片, 仲飲埋杯苦瓜汁. 走嗰時諗住坐巴士, 因為唔駛喺台北車站行咁遠返酒店, 但睇到巴士牌尾班車在11點從總站已開, 而家11:15, 唔知仲有無車, 所以最後都係搭返捷運.
今日簡直可以用台劇之旅來形容, 我哋今日經過了起碼6個台劇景點呀! 台北之旅 - Day 1Day 1 – 九份, 饒河街夜市, 五分埔
一早出發, 搭8:50機, 10:15到桃園機場. 我們下塌的酒店話就係台北車站附近, 但其實由車站行過去都要成15分鐘, 所以搭國光客運到台北車站, 放底行李, 再出發去九份… 前往九份要搭台鐵往瑞芳再過對面馬路轉乘基隆客運, 好方便, 火車只須40分鐘, 巴士大約20分鐘, 到達九份都係2:20pm . 去九份都係為咗食, 但臨上火車之前食了個quick lunch, 所以都唔係太肚餓.
由舊街行入去, 沿路都係精品舗及食市, 吃了一個炸薯塔, 再吃碗魚丸湯, 回程時再吃了碗芋圓, 到臨搭巴士走之前都買了個烤魷魚食….
原本行程是要搭巴士返去瑞芳再轉6:20pm火車往松山車站去饒河街, 點知在等巴士期間發現有巴士可以直去松山車站, 而且時間又有早, 所以改搭巴士直去松山車站.
到達松山車站只是6:15pm, 比原定搭火車到達時間早了. 行到饒河街夜市, 入口就係胡椒餅, NT$25一個, 非常美味, 難怪排晒長龍. 再行其實好多嘢都想食, 但胃容量有限, 必須審慎選擇, 見到烤粟米, 出面加一層香麥, 買咗一支試吓, 味道一般…. 食完後, 買了一杯蜂蜜紅茶, 大大杯只係NT$25, 足以令我飲咗成個鐘. 下一站…五分埔. 由饒河街夜市行去五分埔只須15分鐘, 呢度係一個成衣批發市場, 幾條街都係賣衫…行了接近一個鐘再步行去後山碑站搭捷運返台北.
原本行程仲有一個師大夜市, 我哋返到台北都未夠9:30, 但一早起身搭飛機, 又已經好飽, 所以放棄了. 只在台北車站附近逛一逛便返酒店.
December 01 給自己的生日禮物早前有一張富豪機場酒店入面OM Spa 嘅coupon, 可以免費享用至尊水療按摩住宿優惠
至尊水療按摩住宿優惠
價目：淨價HK$4,888雙人水療住宿優惠 於是趕喺deadline前 (2008/11/30), 相約好友去享受一吓.
我哋準時兩點到達, 個Massage 就book 咗3點. 我哋入住嘅係Karma Suite, 位於3/F OM Spa內, 沿路行入房都好大陣香薰味, 聞到都暈暈哋. 至於房間, 有室外室內. 室外有一個Jacuzzi, 花園仔; 室內就有一個Steam Room, Shower Room, Jacuzzi….
本來個Massage可以喺室外做, 但天氣涼了, 按摩師提議轉去另一間Massage Room, 又唔駛整污糟間房, 我哋當然無所謂啦.
經過兩個半多小時, 回房間沖個涼, 又到晚餐時間. 手上有張 $500 Coupon, 於是去食日本嘢, 都幾貴ga, 諗住都係比返少少餘數, 點知7點都未到, 入面只得少貓幾隻, Waiter 居然話今晚booking full 了, 要成9點先有位….Ok, 改食對面中餐, 價錢上仲可以叫多d嘢食, 點知同日本餐廳一樣, booking full 晒, 又唔想食Buffet (雖然都係無位), 因為我哋有張 Buy 1 get 1 free 嘅lunch Buffet coupon, 諗住可以第二日食. 結果在別無他選嘅情況下, 去咗食一間貴夾唔飽嘅 “China Coast Bar & Grill”, 埋單 $502.6, 扣返都係比返 $3, 但我哋只係食咗1 個Starter, 1個Steak. 所以最後我哋去咗機場7仔買了兩個杯麵做宵夜.
相對第一晚嘅dinner, 第二朝嘅早餐豐富得多, 由於係Room Service, 沒有時間限制, 24小時都可以order. 我哋從Menu 中選了American Breakfast, 因最多嘢食. 食完都成11點, 再玩吓個Jacuzzi, steam, 都仲係飽到上心口, 於是放棄了個lunch buffet, 改為 2 點check out 後去T2 板前食 $3 件三文魚壽司.
兩日一夜嘅行程就咁結束, 雖然沒有什麼特別, 就當係比自己一份生日禮物, relax 吓啦. 東京之旅 – 飲食篇
Day 1 Breakfast - HK International Airport Lunch - 飛機上 Dinner - 池袋牧場 (sukiyaki) [原先諗住去無敵家食拉麵, 但人龍太長, 又落大雨, 只好放棄]
Day 2 Breakfast - At Hotel Lunch - Italian Food (台埸) Dinner - 日式燒烤 (新宿)
Day 3 Breakfast - At Hotel Lunch - 淺草街頭小食 Dinner - 鐵板燒 (池袋)
Day 4 Breakfast - At Hotel, 壽司(築地) Tea - Café R (六本木) Dinner - 牛肉飯 (涉谷)
Day 5 Breakfast - At Hotel Lunch - 廻轉壽司 (秋葉原) Dinner - Pepper Lunch (池袋)
Day 6 Breakfast - At Hotel Lunch - MacDonald (橫濱) Dinner - 壽司 (from 東武)
Day 7 Breakfast - 杯麵 Lunch - 魚生飯 (上野) Dinner - 冷烏冬 (成田機場)
東京之旅 – 行程篇7 天東京之旅完結了, 一如過往, 去東京只有一個字形容 - 累
總結一下行程, 頭5天, 我是一個導遊, 之後的日子, 我就變了一個 Merchandiser, 周圍幫朋友們格價, 購物
Day 1 香港 -> 成田 -> 池袋
Day 2 台場 -> 新宿
Day 3 池袋 -> 淺草 -> 秋葉原 ->池袋
Day 4 築地 -> 銀座 -> 皇宮 -> 六本木 -> 原宿 -> 涉谷
Day 5 上野 -> 秋葉原 -> 上野 -> 原宿 -> 新宿 -> 池袋
Day 6 橫濱 -> 有樂町 -> 秋葉原 -> 池袋
Day 7 池袋 -> 上野 -> 成田 -> 香港
以上 藍色 highlight 的地方是為了幫朋友們購物而重覆再去的.
June 30 遙望仍是雨夜 凝望窗外 沉默的天際 問蒼天 可會知 心裡的感覺 隨著歲月 無盡愛念 藏在於心裡 像冰封的眼光 失去了方向 讓雨點輕輕的灑過 強把憂鬱再掩蓋 像碎星閃閃于天邊叫喚你 遙望盼望 能像清風陪伴他飄去 讓孤單的臂彎 一抱緊你 回望往日如露似夢無奈的輕嘆 是他的歡笑聲 風似輕吹過 每天多麼多麼的需要 永遠與你抱擁著 忘掉世間一切痛苦悲哀 總使分開分開多麼遠 也會聽到你呼喚 期待我這一生再會你 June 27 在新加坡的11小時
經過13小時機程, 大約於7:35到達行程最後一個目的地, 新加坡. 選搭星航其中一個原因, 就係可以去埋新加坡, 嚟一個day trip.
新加坡比我第一個印象係 – 熱, 一出機場, 就如一個焗爐, 我在衣著上已有所準備, 背心短褲, 但依然有一種想死嘅感覺.
之前都沒有plan過想去邊, 只plan過要食d咩同去Merlion影幅到此一遊. 但由我老豆帶隊, 又一次的中礁.
第一站搭MRT 去小印度, 印度及英國的小印度我都去過, 我到而家都唔知去嚟做乜,街頭行到街尾, 只有熱字.
跟住比$3搭SIA provide嘅travel bus ($3 全日任搭, 可以去到大部份旅遊點, 但唔去機場) 到Opera House, 再沿路行去Merlion, 只是短短的5分鐘行程, 太陽都未正式浦頭, 我已差點被焗暈, 都唔知d人點可以喺度生存. 影完相後, 即刻衝入Starbuck 買杯 Frappccino 降溫先舒服返d.
在沿路行去老巴剎, 見到有好多地道嘢食, 但實在太熱, 無辦法喺呢度食得落嘢, 只好搭車去下一站Clark Quay 揾地方食嘢(係貴d, 但我老豆suggest), 我們搵了一間有冷氣的酒家食lunch, order 了我想食嘅黑椒蟹, yummy.
After lunch, 步行去牛車水, 都係到此一遊, 跟住我老豆約了人喺度, 於是我同阿媽就去咗Orchid Road 行街, 去到Orchid Road, 人山人海, 即刻走入shopping mall降溫, 行了一陣 (都無乜mood 行, 雖則大減價, 都唔見平得去邊), 便到超級市場幫朋友掃貨, 之後再搵food court 食我至愛嘅喇沙. 本來想食埋海南雞飯, 但個胃容納唔到, 只好放棄, 早知外賣上機食, 回程時嘅飛機餐好難食
時間已經4點多, 我們7點機, 要5點返到機埸, 都係時候離開了, 搭返MRT返機場, 新加坡之行亦告一段落.
以前都去過其他東南亞城市, 都無新加坡熱/焗得咁厲害, 以後如非必要, 我諗我都唔會再踏足這裡. |
|
|
